Çexiya Prezidenti Petr Pavel Rusiyanın Ukrayna ilə müharibənin dayandırılması üçün real danışıqlara başlamaq niyyətini nümayiş etdirmədiyini bildirib.
Elpress.az xəbər verir ki, Pavel bu barədə almaniyalı jurnalist Paul Ronzheimerə müsahibəsində danışıb.
Çexiya liderinin sözlərinə görə, Moskva NATO-nun bütün üzvlərini münaqişənin iştirakçısı hesab edir və alyans ölkələrinə qarşı kiberhücumlar, eləcə də digər hibrid üsullardan istifadə edir.
Pavel qeyd edib ki, danışıqların başlanması üçün ilk növbədə tərəflər arasında müzakirələrə hazır olmaq barədə ümumi razılıq əldə edilməlidir. Onun fikrincə, Rusiyanın danışıqlara açıq olması ilə bağlı bəyanatları konkret təkliflərlə müşayiət olunmayıb.
Prezident vurğulayıb ki, Ukrayna Prezidenti Volodimir Zelenski Rusiya və Ukrayna rəhbərlikləri arasında görüşün keçirilməsini dəfələrlə təklif edib. Moskvanın isə Ukrayna və Avropanın iştirak etmədiyi, ABŞ və Çinlə danışıqlar aparılması təşəbbüsü irəli sürdüyünü bildirib.
Pavelin fikrincə, Ukraynada atəşkəsə nail olmaq Avropanın təhlükəsizliyi ilə bağlı daha geniş müzakirələr üçün də zəmin yarada bilər.
