Azərbaycanlı tədqiqatçı Nicat Mehdiyev Almaniyanın Leypsiq Universitetində intellektual informasiya sistemləri və prosesləri istiqaməti üzrə professor vəzifəsini icra etməyə başlayıb.
Elpress.az xəbər verir ki, universitetin İqtisadiyyat və İdarəetmə Elmləri Fakültəsinin rəsmi məlumatına əsasən, Mehdiyev bu vəzifəyə 2026-cı il oktyabrın 1-dən başlayıb. O, eyni zamanda Almaniya Süni İntellekt Tədqiqat Mərkəzində (DFKI) informasiya sistemləri üzrə şöbə meneceri və aparıcı elmi işçi kimi fəaliyyət göstərib. Universitetdəki yeni vəzifəsi ilə əlaqədar mərkəzdəki işindən müvəqqəti ayrılıb.
Nicat Mehdiyevin elmi araşdırmalarının əsas istiqamətlərini izah edilə bilən süni intellekt, proseslərin təhlili və insan mərkəzli süni intellekt texnologiyaları təşkil edir. Bu sahələrdə onun tədqiqatları mürəkkəb proseslərin proqnozlaşdırılması, məlumatlar əsasında qərarların verilməsi və süni intellekt nəticələrinin daha anlaşıqlı olmasına yönəlib.
Alim ali təhsilini Almaniyanın Zigen Universitetində informasiya sistemləri üzrə alıb. Daha sonra Münhen Texniki Universiteti və Auqsburq Universitetinin birgə magistr proqramını fərqlənmə ilə bitirib. Saarland Universitetində doktorluq dissertasiyasını izah edilə bilən süni intellektin proqnostik proses təhlilində tətbiqinə həsr edib.
Mehdiyev elmi fəaliyyəti ilə yanaşı, Avropada Yaşayan Azərbaycanlı Mühəndislərin forumlarında da iştirak edib, süni intellekt mövzusunda təqdimatlarla çıxış edib və panel müzakirəsinə moderatorluq edib.
Qeyd edək ki, Leypsiq Universitetinin açıqlamasında alimin yeni vəzifəsi professorluğun müvəqqəti icrası kimi təqdim olunur.
