Azərbaycan son illərdə enerji sektorunda həyata keçirdiyi strateji layihələr hesabına bölgənin əsas enerji mərkəzlərindən biri statusunu möhkəmləndirib.
Elpress.az xəbər verir ki, Bakı Dövlət Universitetinin professoru Kamilə Əliyevanın sözlərinə görə, “Bakı Enerji Həftəsi” enerji sahəsində beynəlxalq əməkdaşlığın genişləndirilməsi baxımından mühüm əhəmiyyət daşıyır. O qeyd edib ki, tədbir enerji şirkətləri, investorlar və mütəxəssislər arasında əməkdaşlığın inkişafına, həmçinin aktual məsələlərin müzakirəsinə geniş imkan yaradır.Professor bildirib ki, builki forumun Xəzər Neft və Qaz Sərgisinin 30 illiyi ilə eyni dövrə təsadüf etməsi rəmzi məna daşıyır. Onun fikrincə, həmin sərgi Azərbaycanın beynəlxalq enerji bazarına inteqrasiyasında və sonrakı illərdə reallaşan iri layihələrin əsasının qoyulmasında mühüm rol oynayıb.K.Əliyeva vurğulayıb ki, ölkənin zəngin enerji resurslarından səmərəli istifadə etməsi, xarici tərəfdaşlarla qurulan əməkdaşlıq və ixrac marşrutlarının genişləndirilməsi Azərbaycanın iqtisadi inkişafına ciddi töhfə verib.Onun sözlərinə görə, enerji təhlükəsizliyi hazırda qlobal gündəliyin əsas mövzularından biri olaraq qalır və bu sahədə etibarlı tərəfdaş kimi çıxış edən ölkələrin əhəmiyyəti daha da artır.Professor qeyd edib ki, Azərbaycanın maliyyə sabitliyi, strateji ehtiyatlarının həcmi və xarici borc göstəricilərinin qənaətbəxş səviyyədə qalması ölkənin iqtisadi dayanıqlığını nümayiş etdirir. Enerji sektorundan əldə olunan gəlirlərin qeyri-neft sahələrinin inkişafına yönəldilməsi isə iqtisadiyyatın şaxələndirilməsinə şərait yaradıb.O əlavə edib ki, Azərbaycan qazının Avropa bazarlarına nəqli ölkənin qitənin enerji təminatındakı rolunu daha da gücləndirib. Eyni zamanda, nəqliyyat və logistika layihələri də Azərbaycanın regionlararası əlaqələrdə strateji mövqeyini artırır.K.Əliyevanın fikrincə, enerji və nəqliyyat sahələrində həyata keçirilən layihələr Azərbaycanın beynəlxalq əhəmiyyətinin artmasına və regional əməkdaşlığın genişlənməsinə xidmət edir.
