Prezident İlham Əliyev milli birlik, müstəqillik və gələcək nəsillərin vətənpərvərlik ruhunda yetişdirilməsinin vacibliyini vurğulayıb
Elpress.az xəbər verir ki , Prezident İlham Əliyev Şuşada keçirilən IV Şuşa Qlobal Media Forumunun açılış mərasimində çıxışı zamanı Azərbaycanın gələcəyi, milli kimliyin qorunması və müstəqilliyin əhəmiyyəti ilə bağlı mühüm mesajlar verib.Dövlət başçısı bildirib ki, dünya sürətlə dəyişir, yeni təhdidlər və təxribatlar meydana çıxır. Onun sözlərinə görə, Azərbaycanı istəməyən qüvvələrin bu niyyətindən əl çəkəcəyini düşünmək düzgün deyil və ölkə öz hüquqlarını, milli maraqlarını və müstəqilliyini daim qorumalıdır.Prezident qeyd edib ki, bəzi ölkələr və onların rəhbərləri başqa dövlətlərin himayəsinə güvənərək təhlükəsizlik əldə edəcəklərini hesab etsələr də, sonda böyük geosiyasi oyunların qurbanına çevrilirlər. İlham Əliyev vurğulayıb ki, Azərbaycan xalqı işğalın ağrılarını, Zəfəri, eləcə də bərpa və dirçəliş dövrünü yaşayıb və bu təcrübə gələcək nəsillər üçün mühüm örnəkdir.Dövlət başçısı gənclərə müraciət edərək bildirib ki, milli kimlik və milli ləyaqət hər zaman hər şeydən üstün tutulmalıdır. O qeyd edib ki, çətinliklər və məğlubiyyətlər olsa belə, xalq heç vaxt əyilməməli, işğalçının diktəsini qəbul etməməli və Vətənə sədaqətini qoruyaraq gələcək nəsillərə bu dəyərləri aşılamalıdır.
