Bakının keçmiş sənaye ərazisində yaradılan müasir şəhərsalma layihəsi dövlət başçısı İlham Əliyev və Çeçenistan Respublikasının rəhbəri Ramzan Kadırovun diqqətində olub.
Elpress.az xəbər verir ki, oktyabrın 10-da Prezident İlham Əliyev və Rusiyanın Çeçenistan Respublikasının başçısı Ramzan Kadırov “Bakı Ağ Şəhər”də olublar.
Layihənin icraçı direktoru Ruslan Sadıxov qonağa ərazidə görülən işlər və yaradılmış şərait barədə məlumat verib.
Bildirilib ki, vaxtilə “Qara şəhər” adlandırılan və 150 ildən artıq müddətdə neft sənayesinin tullantıları ilə çirklənən ərazidə genişmiqyaslı ekoloji layihə həyata keçirilib. Nəticədə burada müasir yaşayış məhəlləsi formalaşdırılıb.
2011-ci il dekabrın 24-də başlanılan “Bakı Ağ Şəhər” layihəsi ekoloji təmizlik, dayanıqlı inkişaf və “ağıllı şəhər” prinsipləri əsasında reallaşdırılır. Ərazidə yaşıllıq sahələri, geniş küçələr və müasir şəhər infrastrukturu yaradılıb.
