Azərbaycan Rusiyanı səfirliyin qonaq evi qarşısındakı insidenti araşdırmağa çağırıb
Elpress.az xəbər verir ki, Azərbaycan Xarici İşlər Nazirliyi Azərbaycanın Rusiyadakı səfirliyinin qonaq evi qarşısında ölkə əleyhinə təxribat xarakterli şəkillərin yerləşdirilməsinə münasibət bildirib.XİN-dən verilən məlumata görə, avqustun 27-də günorta saatlarında naməlum şəxslər tərəfindən sözügedən ərazidə Azərbaycana qarşı təxribat xarakterli materiallar yerləşdirilib. Nazirlik hadisəni qəbuledilməz hesab edərək qətiyyətlə pisləyib.Xarici İşlər Nazirliyi bu insidentin Azərbaycan-Rusiya münasibətlərində süni gərginlik yaratmağa yönəldiyini və son dövrlərdə Rusiyanın bəzi media resurslarında Azərbaycana qarşı aparılan qərəzli kampaniyanın bir hissəsi ola biləcəyini bildirib.Azərbaycan tərəfi Rusiyanın aidiyyəti qurumlarını hadisəni hərtərəfli araşdırmağa, təxribatın hüquqi qiymətləndirilməsini təmin etməyə və oxşar halların gələcəkdə təkrarlanmaması üçün zəruri tədbirlər görməyə çağırıb.Nazirlik həmçinin Moskvanın 1961-ci il Diplomatik Münasibətlər haqqında Vyana Konvensiyasından irəli gələn öhdəliklərə uyğun olaraq Azərbaycanın diplomatik nümayəndəliyinin və əməkdaşlarının təhlükəsizliyini təmin etməsini gözlədiyini vurğulayıb. XİN səfirliyin normal fəaliyyətinə mane ola biləcək hər hansı təxribatın qarşısının alınmasının vacibliyini qeyd edib.
