Azərbaycan-Pakistan münasibətlərinin möhkəmləndirilməsi və əməkdaşlığın yeni istiqamətləri dövlət başçısı İlham Əliyev ilə Pakistanın Baş naziri Məhəmməd Şahbaz Şərif arasında telefon danışığının əsas mövzularından olub.
Elpress.az xəbər verir ki, söhbət zamanı iki ölkə arasında dostluq və qardaşlıq əlaqələrinin, eləcə də strateji tərəfdaşlığın inkişafından məmnunluq ifadə edilib. Yüksək səviyyəli qarşılıqlı səfərlərin və müntəzəm məsləhətləşmələrin münasibətlərin daha da dərinləşməsinə töhfə verdiyi vurğulanıb.
Məhəmməd Şahbaz Şərif Pakistan xalqının Azərbaycan Prezidentinə və ölkəmizin vətəndaşlarına böyük hörmət bəslədiyini bir daha diqqətə çatdırıb. Tərəflər siyasi əlaqələrlə yanaşı, iqtisadiyyat, ticarət və investisiya sahələrində əməkdaşlığın genişləndirilməsinin əhəmiyyətini qeyd ediblər.
Danışıq zamanı Azərbaycanın dövlət xidmətləri sahəsində təcrübəsi də müzakirə olunub. Pakistanın Baş naziri İslamabadda “ASAN xidmət” modeli əsasında yaradılan mərkəzin fəaliyyətindən razılığını bildirib və bu təcrübənin ölkəsinin digər bölgələrində tətbiqi üçün Azərbaycanın dəstəyini xahiş edib.
Prezident İlham Əliyev müraciətə müsbət yanaşaraq, müvafiq dəstəyin göstərilməsinə razılıq verib. Şahbaz Şərif isə bu mövqeyə görə dövlət başçısına təşəkkür edib və Azərbaycanın dəstəyini iki ölkə arasındakı dostluq və həmrəyliyin göstəricisi kimi dəyərləndirib.
Telefon danışığında Pakistanın son dövrlərdə regional və beynəlxalq müstəvidə dialoqun təşviqi, vasitəçilik və gərginliyin azaldılması istiqamətində atdığı diplomatik addımlar da təqdir edilib.
Sonda tərəflər ikitərəfli və çoxtərəfli əməkdaşlıq gündəliyindəki məsələlər, eləcə də regional və beynəlxalq vəziyyət barədə fikir mübadiləsi aparıblar.
