Qubanın Dağlı kəndində iki qonşu arasında torpaq məsələsinə görə yaranan mübahisə məhkəmə ilə yekunlaşıb. Hadisə zamanı qadının əlindən xəsarət aldığı bildirilir.
Elpress.az xəbər verir ki, Lent.az-ın məlumatına görə, hadisə 45 yaşlı Yusif Nəzərovla bağ qonşusu olan, şərti adı Nəzakət kimi göstərilən qadın arasında baş verib.
Məhkəmə materiallarına əsasən, tərəflər arasında əvvəllər münasibətlər normal olsa da, sonradan torpaq məsələsinə görə mübahisələr yaranıb. Sonuncu qarşıdurma zamanı Nəzərovun əlindəki otbiçən mişarla qadının əlinə xəsarət yetirdiyi qeyd olunur.
Təqsirləndirilən şəxs ifadəsində mübahisənin iki-üç dəqiqə davam etdiyini və həmin vaxt qadının əlindən yaralandığını bildirib. O, daha sonra zərərçəkmiş şəxslə barışdıqlarını deyib. Qadın da qonşusundan şikayətçi olmadığını bildirib.
Məhkəmənin qərarı ilə cinayət işinə xitam verilib və Yusif Nəzərov məsuliyyətdən azad edilib.
