Bakının və Minskın strateji tərəfdaşlıq əlaqələrinin inkişaf perspektivləri müzakirə olunub
Elpress.az xəbər verir ki, Azərbaycan və Belarus xarici işlər nazirlikləri arasında siyasi məsləhətləşmələrin növbəti raundu keçirilib.Avqustun 28-də Azərbaycanın xarici işlər nazirinin müavini Samir Şərifov Belarusda səfərdə olub. Səfər çərçivəsində o, Belarusun xarici işlər naziri Maksim Rıjenkovla görüş keçirib. Görüşdə iki ölkə arasında strateji tərəfdaşlıq münasibətlərindən irəli gələn məsələlər nəzərdən keçirilib və əlaqələrin inkişafında dövlət başçılarının rolunun əhəmiyyəti vurğulanıb.Daha sonra Azərbaycan və Belarus XİN-ləri arasında siyasi məsləhətləşmələrin növbəti mərhələsi baş tutub. Görüşlərə Azərbaycan tərəfindən Samir Şərifov, Belarus tərəfindən isə xarici işlər nazirinin müavini Pavel Utyupin rəhbərlik edib.Məsləhətləşmələr zamanı iki ölkə arasındakı siyasi dialoqun müsbət inkişaf etdiyi qeyd olunub. Həmçinin Hökumətlərarası Komissiyanın fəaliyyəti və siyasi məsləhətləşmələr mexanizminin əməkdaşlığın genişləndirilməsindəki rolu diqqətə çatdırılıb.Tərəflər əvvəl əldə edilmiş razılaşmaların icra vəziyyətini, eləcə də ticarət-iqtisadi əlaqələr, energetika, kənd təsərrüfatı və humanitar sahələrdə əməkdaşlığın mövcud durumunu və gələcək imkanlarını müzakirə ediblər.Görüşdə regional və beynəlxalq təşkilatlar çərçivəsində qarşılıqlı fəaliyyət məsələləri də nəzərdən keçirilib. Bundan başqa, tərəflər qarşılıqlı maraq doğuran digər ikitərəfli və regional mövzular üzrə fikir mübadiləsi aparıblar.
