Elpress.az xəbər verir ki, Prezident Sərdar Berdiməhəmmədovin Azərbaycana son dövlət səfəri çərçivəsində qardaş ölkə Türkmənistana hədiyyə edilən “Dostlug” neft tankeri ilk səfərini uğurla başa vuraraq Türkmənbaşı Beynəlxalq Dəniz Limanına çatıb.
Türkmənistan mətbuatında dərc olunan məqalədə bildirilir ki, Bakı Gəmiqayırma Zavodunda inşa edilən müasir tanker limanda təntənəli mərasimlə qarşılanıb. Qarşılama mərasimində şəhər rəhbərliyinin nümayəndələri, ağsaqqallar, liman əməkdaşları, dənizçilik ixtisası üzrə təhsil alan gənclər və çoxsaylı sakinlər iştirak ediblər.
Mərasim çərçivəsində mədəniyyət və incəsənət xadimlərinin çıxışları təqdim olunub, “Dostlug” tankerinin Azərbaycan və Türkmənistan arasında sarsılmaz dostluq və qardaşlıq münasibətlərinin növbəti rəmzi olduğu vurğulanıb.
Qeyd olunub ki, yeni gəmi Türkmənistanın dəniz ticarət donanmasının imkanlarını daha da genişləndirəcək. Uzunluğu 141 metr, eni 16,9 metr olan tanker 8 min ton yükdaşıma qabiliyyətinə malikdir və Xəzər dənizi vasitəsilə karbohidrogen daşımalarının həcminin artırılmasına xidmət edəcək.
Məqalədə vurğulanır ki, tanker müasir gəmiçilik və təhlükəsizlik standartlarına uyğun inşa olunub, onun hərəkətinə və naviqasiya sisteminə qabaqcıl texnologiyalar vasitəsilə nəzarət edilir.
Mərasim iştirakçıları “Dostlug” tankerinin iki qardaş xalqın rifahına, iqtisadi-ticari əlaqələrin daha da möhkəmlənməsinə töhfə verəcəyinə əminliklərini ifadə edərək, gəmiyə Xəzərin sularında uğurlu səfərlər arzulayıblar.
