Prezident İlham Əliyev bildirib ki, Azərbaycanın əsas prioritetləri sırasında təhlükəsizlik, enerji, rəqəmsal inkişaf və Qarabağın bərpası xüsusi yer tutur.
Elpress.az xəbər verir ki, Prezident İlham Əliyev bu fikirləri IV Şuşa Qlobal Media Forumunda çıxışı zamanı səsləndirib.Dövlət başçısı qeyd edib ki, ölkənin gündəliyində Qarabağın bərpası, davamlı inkişaf, yeni nəqliyyat marşrutlarının yaradılması, rəqəmsal transformasiya, süni intellektin inkişafı və enerji təhlükəsizliyi kimi mühüm istiqamətlər yer alır.Onun sözlərinə görə, bərpa olunan enerji sahəsində Azərbaycanın böyük potensialı var. Qarabağda artıq 340 meqavat gücündə su elektrik stansiyaları istifadəyə verilib, eyni gücdə günəş elektrik stansiyasının tikintisinin isə gələn il başa çatdırılması planlaşdırılır. Prezident əlavə edib ki, bu imkanlar Avropaya elektrik enerjisi ixracının genişləndirilməsinə şərait yaradacaq.İlham Əliyev vurğulayıb ki, hazırkı dövrdə ən vacib məsələlərdən biri təhlükəsizlik və müdafiə qabiliyyətinin gücləndirilməsidir. O bildirib ki, regionda mövcud təhlükəsizlik riskləri nəzəri deyil, real xarakter daşıyır və Azərbaycan milli maraqlarını qorumaqla yanaşı, digər ölkələrlə praktik və qarşılıqlı faydalı əməkdaşlığı da inkişaf etdirmək niyyətindədir.
