Prezidentdən sülh mesajı: “Bu gün nəticələri hiss edirik”

Elpress.az “Qafqazinfo”ya istinadən xəbər verir ki, Prezident İlham Əliyev Avropa Komissiyasının Prezidenti Ursula fon der Lyayen ilə birgə mətbuata bəyanatında Azərbaycanın sülh gündəliyinə sadiqliyini bir daha vurğulayıb.Dövlət başçısı bildirib ki, Azərbaycan sülhün yalnız sənədlərdə deyil, real həyatda da hiss olunması üçün mühüm addımlar atıb.Onun sözlərinə görə, Ermənistan tərəfindən Azərbaycanın beynəlxalq səviyyədə tanınmış ərazilərinin uzun illər işğal altında saxlanılması səbəbindən tətbiq edilən məhdudiyyətlər aradan qaldırılıb və hazırda Azərbaycan ərazisindən Ermənistana yük daşımalarına tranzit imkanları yaradılıb. Prezident əlavə edib ki, ölkə Ermənistana benzin və dizel kimi mühüm yanacaq məhsullarının tədarükünə də başlayıb.İlham Əliyev qeyd edib ki, bu addımlar Azərbaycanın sülhə səmimi yanaşmasının göstəricisidir:“Beləliklə, biz göstəririk ki, sülh bizim üçün artıq hiss olunan məfhumdur, onu hiss edə bilirik və sülh şəraitində yaşamağı öyrənirik”.Prezident xatırladıb ki, Azərbaycanın torpaqları 30 il işğal altında qalıb, ölkə isə suverenliyini və ərazi bütövlüyünü hərbi və siyasi yollarla bərpa edib. Bununla yanaşı, Azərbaycanın Ermənistana sülh təklifi verdiyini diqqətə çatdıran dövlət başçısı bildirib ki, əsas məqsəd mövcud sülh mühitini möhkəmləndirmək və onu uzunmüddətli etməkdir.İlham Əliyev çıxışının sonunda Avropa Komissiyasının bu istiqamətdə göstərdiyi dəstəyi yüksək qiymətləndirdiyini də vurğulayıb.