Ali Məhkəmənin sədri məhkəmə hakimiyyəti və süni intellektin tətbiqi ilə bağlı müzakirələrdə çıxış edib
Elpress.az xəbər verir ki, Azərbaycan Respublikası Ali Məhkəməsinin sədri İnam Kərimovun rəhbərlik etdiyi nümayəndə heyəti sentyabrın 16–18-də Koreya Respublikasının paytaxtı Seulda keçirilən Asiya və Sakit okean regionu ölkələri Ali Məhkəmələri sədrlərinin 20-ci Konfransında iştirak edib.Tədbirdə məhkəmə hakimiyyətinin rolu, hüquq və məhkəmə sistemində süni intellektdən istifadə, hakimlərin müasir tələblərə uyğun hazırlanması, məhkəmələrə ictimai etimadın artırılması, media ilə əlaqələr, məhkəmə müstəqilliyi, arbitrajın inkişafı və digər aktual məsələlər müzakirə olunub.İnam Kərimov “Məhkəmə hakimiyyətinin rolu – müxtəlif yurisdiksiyalardan fərqli baxışlar” mövzusunda keçirilən sessiyada məruzə ilə çıxış edib. O, Azərbaycanda aparılan məhkəmə-hüquq islahatları, məhkəmə sisteminin müasir çağırışlara uyğun inkişafı, məhkəmə müstəqilliyinin təmin edilməsi və ədalət mühakiməsinin səmərəliliyinin artırılması istiqamətində görülən işlər barədə məlumat verib.Çıxış zamanı məhkəmə xidmətlərinin əlçatanlığının genişləndirilməsi və müasir çağırışların həllində beynəlxalq əməkdaşlığın əhəmiyyəti də vurğulanıb.Səfər çərçivəsində İnam Kərimov Koreya, Latviya, Çexiya və Türkiyənin ali məhkəmələrinin rəhbərləri ilə ikitərəfli görüşlər keçirib. Görüşlərdə məhkəmə-hüquq sahəsində əməkdaşlığın inkişafı, təcrübə mübadiləsinin genişləndirilməsi və gələcək əməkdaşlıq imkanları müzakirə olunub.
