İclasda cinayət qanunvericiliyi, məhkəmə ekspertizası və rəqəmsal kriminalistika məsələləri müzakirə olunub
Elpress.az xəbər verir ki, Sentyabrın 17-də Azərbaycan Respublikasının Baş prokuroru yanında Elmi-Məsləhət Şurasının növbəti iclası keçirilib.İclasa rəhbərlik edən Baş prokuror və Şuranın sədri Kamran Əliyev hüquq sisteminin qarşısında dayanan yeni vəzifələrdən, qanunun aliliyinin və insan hüquqlarının təmin olunmasından, həmçinin cinayətkarlıqla mübarizənin gücləndirilməsinin əhəmiyyətindən danışıb.Görüşdə azad edilmiş ərazilərdə bərpa və quruculuq işləri, Böyük Qayıdış prosesi, regional sabitliyin möhkəmləndirilməsi, beynəlxalq əməkdaşlığın genişləndirilməsi və rəqəmsal inkişafın hüquq sahəsinə təsiri ilə bağlı məsələlər də diqqətə çatdırılıb.İclasın gündəliyində cinayət qanunvericiliyində gəlir və cinayət yolu ilə əldə edilmiş gəlirin hesablanması, məhkəmə ekspertizasında mövcud problemlər, ekspertiza tədqiqatlarının keyfiyyətinin artırılması, vergi yoxlamaları ilə bağlı qərarlardan şikayət müddətləri, xüsusi müsadirənin icrası və Cinayət Məcəlləsinin 283-cü maddəsinin təkmilləşdirilməsi kimi məsələlər yer alıb.Bundan əlavə, antikorrupsiya komplayens funksiyası, cinayət işlərinin ibtidai istintaqında rəqəmsal kriminalistikanın tətbiqi və yol hərəkəti qaydalarının pozulması ilə bağlı cinayətlərin təhlilinə dair metodiki vəsaitlər təqdim olunub.Müzakirələr zamanı hüquq tətbiqetmə təcrübəsində yaranan məsələlər nəzərdən keçirilib, rəqəmsal kriminalistikanın imkanları ətrafında fikir mübadiləsi aparılıb. Şura üzvləri qanunvericiliyin və hüquq tətbiqetmə mexanizmlərinin təkmilləşdirilməsi ilə bağlı təkliflərini səsləndiriblər.İclasın sonunda Kamran Əliyev müzakirə olunan məsələlərin praktiki əhəmiyyətini vurğulayaraq, irəli sürülən təkliflərin nəzərə alınması və zəruri hallarda qanunvericiliyin təkmilləşdirilməsi istiqamətində tədbirlərin görülməsinin vacibliyini bildirib.
