Prezident İlham Əliyevin Yeni Azərbaycan Partiyasının VIII Qurultayındakı çıxışından diqqət çəkən fikirlər sosial şəbəkələrdə yayımlanan yeni videoçarxda yer alıb.
Elpress.az xəbər verir ki, Dövlət başçısının sosial media hesablarında paylaşılan görüntülərdə Azərbaycanın müharibə və postmüharibə dövründə atdığı addımlara toxunulub. Prezident qeyd edib ki, 2020-ci il müharibəsi və 2023-cü ilin sentyabrında baş verən hadisələr zamanı müxtəlif ssenarilər mümkün olsa da, strateji yanaşma və ölkənin əsas maraqları nəzərə alınaraq qərarlar qəbul edilib.
İlham Əliyev bildirib ki, Azərbaycanın məqsədi əbədi müharibə aparmaq olmayıb. Onun sözlərinə görə, hər iki mərhələdə uyğun məqamda dayanmaq və sülhə nail olmaq qərarı uzaqgörənlik və strateji düşüncə ilə bağlı olub.
Prezident bu kontekstdə siyasətdə emosional qərarlara yer olmadığını vurğulayaraq diqqətçəkən bir ifadə səsləndirib:
“Siyasətdə emosiyalara yer yoxdur. Biz emosiyalara qapılsaydıq, bu gün, yəqin ki, üçüncü Zəfər Tağı İrəvanın mərkəzində ucaldılardı”.
Sözügedən videoçarx Prezidentin YAP-ın VIII Qurultayındakı çıxışından seçilmiş məqamlar əsasında hazırlanıb.
