Elm və təhsil naziri Emin Əmrullayev qızların təhsil imkanlarının genişləndirilməsinin həm onların gələcək həyatına, həm də cəmiyyətin inkişafına təsir etdiyini bildirib.
Elpress.az xəbər verir ki, nazir bu fikirləri “Qızların Təhsilinə Dəstək” layihəsinin beşilliyinə və Hacı Zeynalabdin Tağıyevin qızlar məktəbinin yaradılmasının 125-ci ildönümünə həsr olunan tədbirdə səsləndirib.
Əmrullayevin sözlərinə görə, anası ali təhsilli olan şagirdlərin təlim nəticələri anası daha aşağı təhsil səviyyəsinə malik şagirdlərlə müqayisədə daha yüksək olur. O, təhsilin təsirinin yalnız bir insanın həyatını dəyişməklə məhdudlaşmadığını, gələcək nəsillərə də yayıldığını vurğulayıb.
Nazir qeyd edib ki, beynəlxalq qiymətləndirmələrdə ibtidai siniflərdə qızlar, bir qayda olaraq, oğlanlardan daha yüksək nəticələr göstərsələr də, 15 yaşlı şagirdlərin göstəricilərində mənzərə dəyişir. Onun fikrincə, bu fərqin səbəblərindən biri qızların sosial həyatında qarşılaşdıqları məhdudiyyətlərdir.
Əmrullayev texnoloji ixtisaslara qəbul olunan qızların sayında artımın müşahidə edildiyini də bildirib. O, qızların müstəqil böyüməsinin, sərbəst qərar verməsinin və cəmiyyətdə bərabərhüquqlu iştirakının vacibliyini vurğulayıb.
Nazirin sözlərinə görə, qadınların təhsil, iqtisadiyyat və digər sahələrdə iştirakının genişləndirilməsinin ən təsirli yollarından biri təhsildir. Bu prosesin ibtidai siniflərdən başlayaraq ali təhsil mərhələsinədək davam etməsi vacibdir.
