Ailə, Qadın və Uşaq Problemləri üzrə Dövlət Komitəsinin sədri Bahar Muradova tələbə qızların peşəkar inkişafına dəstək verilməsi üçün dövlət qurumlarını və özəl sektoru əməkdaşlığı genişləndirməyə çağırıb.
Elpress.az xəbər verir ki, Muradova bu fikirləri “Qızların Təhsilinə Dəstək” layihəsinin beşilliyinə və Hacı Zeynalabdin Tağıyevin qızlar məktəbinin 125-ci ildönümünə həsr olunan yubiley tədbirində səsləndirib.
O bildirib ki, Ədliyyə Nazirliyi hüquq ixtisası üzrə təhsil alan 10 tələbə qızı birinci kursdan himayəyə götürərək onların gələcəkdə peşəkar hüquqşünas kimi yetişməsinə və praktiki təcrübə qazanmasına dəstək göstərəcək.
Komitə sədri bu əməkdaşlığın tələbələrin nəzəri biliklərini möhkəmləndirməsinə, hüquq sahəsinin tələblərini daha yaxından öyrənməsinə və gələcək fəaliyyətlərinə hazırlaşmasına kömək edəcəyini vurğulayıb.
Muradova digər dövlət qurumlarını da öz fəaliyyət istiqamətlərinə uyğun dəstək proqramları yaratmağa, ali təhsil müəssisələrini peşəkar inkişaf imkanlarını genişləndirməyə, şirkətləri təcrübə və mentorluq proqramlarına qoşulmağa dəvət edib. O, uğur qazanmış qadınların da bilik və təcrübələrini gənc nəsillə bölüşməsinin əhəmiyyətini qeyd edib.
