Oktyabrın 20-də Zəngilanda ilk dəfə Şəhər Günü münasibətilə bayram tədbirləri təşkil edilib. Proqramın başlanğıcında uşaqlar üçün teatr tamaşası nümayiş olunub.
Elpress.az xəbər verir ki, tədbirlər Mədəniyyət Nazirliyinin təşkilatçılığı, Cəbrayıl, Qubadlı və Zəngilan rayonlarında Prezidentin xüsusi nümayəndəliyinin dəstəyi ilə keçirilir.
Zəngilan Konqres Mərkəzində Gəncə Dövlət Milli Dram Teatrının Şarl Perronun məşhur nağılı əsasında hazırladığı “Çəkməli pişik” tamaşası təqdim edilib. Səhnə əsərini Prezidentin xüsusi nümayəndəsi Vahid Hacıyev, mədəniyyət nazirinin müavini Murad Hüseynov, doğma yurda qayıdan zəngilanlı uşaqlar və onların valideynləri, eləcə də rayon ictimaiyyətinin nümayəndələri izləyiblər.
Elşad Əhmədovun quruluş verdiyi tamaşa ağıllı və hiyləgər Çəkməli pişiyin macəralarından bəhs edir. Nağıl uşaqlar tərəfindən maraqla qarşılanıb.
Qeyd edək ki, Prezident İlham Əliyevin 31 iyul 2023-cü il tarixli Sərəncamı ilə oktyabrın 20-si Zəngilan Şəhəri Günü kimi təsis edilib.
