Azərbaycanın Şəki şəhərində doğulan Aysun Tanrıverdiyeva bu gün təhsilini Qazaxıstanda davam etdirərək beynəlxalq münasibətlər sahəsində gələcəyini qurur.
O, Y.A.Buketov adına Karaqanda Milli Tədqiqat Universitetində beynəlxalq münasibətlər ixtisası üzrə təhsil alır və diplomatiya sahəsində peşəkar fəaliyyət göstərməyi qarşısına məqsəd qoyub.Aysunun həyat yolu Azərbaycanın qədim mədəniyyət ənənələri ilə zəngin bölgəsindən başlayaraq beynəlxalq mühitə uzanıb. Uşaqlıq illərini Şəkinin Təpəcənnət kəndində keçirən gənc tələbə tarixə, mədəniyyətə və milli kimliyə marağının ailə mühitində formalaşdığını deyir.Ailə şəraiti ilə əlaqədar təhsilini Qazaxıstanda davam etdirmək məcburiyyətində qalan Aysun üçün yeni ölkəyə uyğunlaşmaq mühüm həyat təcrübəsinə çevrilib. Müxtəlif mədəniyyətlərlə təmas, fərqli düşüncə tərzləri və beynəlxalq mühit onun dünya görüşünün formalaşmasına ciddi təsir göstərib. Məhz bu dövrdə beynəlxalq münasibətlərə marağı daha da güclənib.Tələbə hesab edir ki, diplomatiya xalqlar və dövlətlər arasında qarşılıqlı anlaşmanın qurulmasına xidmət edən ən vacib sahələrdən biridir. O, beynəlxalq layihələrdə, diplomatik görüşlərdə və müxtəlif tədbirlərdə fəal iştirak etməklə nəzəri biliklərini praktiki təcrübə ilə möhkəmləndirir.Aysunun sözlərinə görə, ailəsinin ona aşıladığı vətənpərvərlik hissi və dövlətə bağlılıq gələcək peşə seçimində mühüm rol oynayıb. Azərbaycan Ordusunun zabiti olmuş atasının həyat yolu və xidmətləri onun üçün məsuliyyət, intizam və Vətənə sədaqət nümunəsinə çevrilib.Gənc tələbə gələcəkdə diplomatiya sahəsində çalışaraq Azərbaycanın maraqlarının beynəlxalq platformalarda müdafiəsinə və ölkəsinin tanıdılmasına töhfə verməyi qarşısına əsas məqsəd kimi qoyub.
