Azərbaycanda inzibati xətalar üzrə balla qiymətləndirmə sistemi son illərdə genişlənib və sürücülərin məsuliyyət mexanizmi əvvəlki dövrlə müqayisədə daha sərt xarakter alıb.
Elpress.az xəbər verir ki, Milli Məclisin növbədənkənar sessiyasında deputat Kamal Cəfərov mövcud ball sistemindəki dəyişikliklərlə bağlı məlumat verib.O xatırladıb ki, Azərbaycan Respublikasının İnzibati Xətalar Məcəlləsi 2016-cı il martın 1-dən qüvvədədir və həmin dövrdə balla qiymətləndirilən pozuntuların sayı daha az olub.Deputatın sözlərinə görə, ötən illər ərzində yol hərəkəti qaydalarının dəyişməsi və mikromobillik vasitələrinin artması ilə birlikdə balla ölçülən inzibati xətaların sayı da yüksəlib. Bu isə sürücülərin risk zonasını genişləndirib.Kamal Cəfərov bildirib ki, hazırda mövcud sistemdə sürücülər əvvəlki illərlə müqayisədə daha az faiz həddində bal topladıqda sürücülük hüququndan məhrum olurlar. Onun fikrincə, bu göstəricilər sistemin yenilənməsinə ehtiyac yaradır.Deputat əlavə edib ki, balansın qorunması üçün limitin artırılması və bəzi aşağı riskli pozuntulara görə yalnız cərimə mexanizminin tətbiqi kimi təkliflər müzakirə olunur. Onun sözlərinə görə, beynəlxalq təcrübədə də oxşar yanaşmalara rast gəlinir.
