AZCON Holding ilə Çinin “CRRC Zhuzhou Locomotive” şirkəti arasında nəqliyyat və şəhər mobilliyi sahəsində əməkdaşlığın genişləndirilməsi məsələləri müzakirə olunub.
Elpress.az xəbər verir ki, AZCON Holding-in icraçı direktoru Şahin Babayev ölkəmizdə səfərdə olan şirkətin sədri Van Çiaolinin rəhbərlik etdiyi nümayəndə heyəti ilə görüşüb.
Görüşdə “Azərbaycan Dəmir Yolları” QSC ilə dörd elektrikli sərnişin qatarının tədarükünə dair müqavilənin imzalanması ikitərəfli əməkdaşlığın mühüm mərhələsi kimi dəyərləndirilib.
Tərəflər Azərbaycanın dəmir yolu şəbəkəsinin inkişafı, nəqliyyat-logistika infrastrukturunun genişləndirilməsi, eləcə də tramvay və digər şəhər mobilliyi layihələrində mümkün əməkdaşlıq istiqamətlərini nəzərdən keçiriblər.
Şahin Babayev AZCON Holding-in idarəetmə yanaşması, nəqliyyat sektorunda planlaşdırılan layihələr və Azərbaycanın regional nəqliyyat əlaqələrinin gücləndirilməsi üzrə prioritetləri barədə məlumat verib.
