Almaniyanın Hamburq şəhərində yaşayan azərbaycanlı gənclər və tələbələr bilik və məntiq bacarıqlarını sınamaqla yanaşı, yeni ünsiyyət imkanları qazanıblar. Şəhərdə soydaşlarımız arasında intellektual yarış təşkil olunub.
Elpress.az xəbər verir ki, Azərbaycan Tələbə və Elmi İşçilər Birliyinin (VASW e. V.) təşkil etdiyi yarışda 30-dan çox azərbaycanlı iştirak edib.
Komandalar şəklində keçirilən oyunda iştirakçılar müxtəlif sahələr üzrə sualları cavablandırıblar. Yarışın gedişində formalaşan fikir mübadiləsi və səmimi ünsiyyət mühiti gənclər arasında yeni tanışlıqların yaranmasına da imkan verib.
Təşəbbüsün gələcəkdə Hamburqla məhdudlaşmaması təklif olunub. Gənc iştirakçılar intellektual oyunların Almaniyanın digər şəhərlərində keçirilməsini, müxtəlif mərhələlərin qaliblərinin isə Berlində təşkil olunacaq finalda bir araya gəlməsini təklif ediblər.
2007-ci ildə yaradılan VASW e. V. Almaniyada yaşayan azərbaycanlı tələbə və gənc mütəxəssislərin müxtəlif istiqamətlərdə fəaliyyətini dəstəkləyir. Birlik eyni zamanda Azərbaycanın tarixi və mədəni irsinin Almaniyada tanıdılmasına yönəlmiş təşəbbüslərdə iştirak edir.
Birliyin İdarə Heyətinin sədri Mədinə Səmədovadır.
