Dövlət İmtahan Mərkəzi (DİM) 2026/2027-ci tədris ili üçün ümumi (9 illik) orta təhsil bazasında orta ixtisas təhsili müəssisələrinin xüsusi qabiliyyət tələb edən ixtisasları üzrə qeydiyyat prosesinə start verib.
Elpress.az xəbər verir ki, qeydiyyat DİM-in müvafiq internet səhifəsi vasitəsilə elektron qaydada aparılır.Məlumata görə, təsviri sənət, teatr, kino və xoreoqrafiya, eləcə də musiqi sənəti istiqamətləri üzrə qabiliyyət imtahanlarında iştirak etmək istəyən abituriyentlər 18–29 iyun tarixlərində qeydiyyatdan keçə bilərlər.Qeyd edilib ki, iştirakçılar yalnız bir istiqamət üzrə müraciət edə bilərlər. İmtahanlarda iştirak üçün buraxılış imtahanının I mərhələsində 50 və daha yüksək bal toplayan abituriyentlər qeydiyyat hüququ qazanırlar.“Qabiliyyət imtahanına buraxılış vərəqəsi”nin çap olunacağı tarixlər barədə məlumat DİM-in rəsmi saytında açıqlanacaq. Sənəddə imtahanın tarixi, vaxtı və keçiriləcəyi ünvan qeyd olunacaq.Xatırladaq ki, xüsusi qabiliyyət tələb edən ixtisaslarla bağlı ətraflı məlumatlar “Abituriyent” jurnalının xüsusi buraxılışlarında əksini tapıb.
