Elşən
03 İyun 2026 · 19:07
166 baxış
Əli Hacının yeni qələmə aldığı şeir oxucular tərəfindən maraqla qarşılanıb.
Ruhuma düşməndi bədən
Ruhuma düşməndi bədən,
Bu sağ əlim, solu tutmur!
Odla, suyla yol gedirəm,
Adamlarla yolum tutmur!
Yaxına dur, məni ovut,
Gülüm, ya da məni unut!
Göylər yağır bulud-bulud,
Mən tərəfi dolu tutmur!
Ah çəkməyib anam boşa,
Min istəyi dəyib daşa!
Bu dünyaya gəldik qoşa,
Sevinc gəlib qolum tutmur!
Qəmə oyna, döz, oyundu,
Qələm, kağız, söz oyundu!
Ölüm – Fələyin oynudu,
Ölümlə də olum tutmur!
