Abşeron çimərliklərində hava əlverişli olacaq: Dəniz suyu isinir, bəzi sahələrdə çirklənmə aşkarlanıb
İyunun 25-də Abşeron çimərliklərində hava şəraitinin əlverişli keçəcəyi, dəniz suyunun temperaturunun isə bəzi ərazilərdə 25 dərəcəyədək yüksələcəyi gözlənilir.Milli Hidrometeorologiya Xidmətinin məlumatına görə, gün ərzində şimal-şərq küləyi əsəcək, axşam saatlarında isə küləyin istiqaməti dəyişərək şimal-qərb küləyi ilə əvəz olunacaq.Dəniz suyunun temperaturu şimal çimərliklərində — Sumqayıt, Novxanı, Pirşağı, Nardaran, Bilgəh və Zaqulbada 22-23 dərəcə, cənub çimərliklərində — Türkan, Hövsan, Sahil və Şıxda isə 24-25 dərəcə isti olacaq.Bununla yanaşı, Səhiyyə Nazirliyi bəzi çimərliklərdə dəniz suyunun keyfiyyəti ilə bağlı xəbərdarlıq edib. Laborator müayinələrin nəticələrinə əsasən, bir sıra ərazilərdə su nümunələrinin sanitariya tələblərinə uyğun olmadığı müəyyən edilib.Monitorinq zamanı Bakı şəhərinin Türkan, Hövsan, Şıx və Sahil qəsəbələrində, həmçinin Lənkəranın Aşağı Nüvədi, Sütəmurdov, Kiçik Bazar yaşayış məntəqələrində və Xaçmazın Niyazoba ərazisində yerləşən çimərliklərdə dəniz suyunun çirkab və tullantı suları ilə çirkləndiyi aşkarlanıb.
