Şuşada “Xarıbülbül” IX Beynəlxalq Musiqi Festivalı davam edir.
Elpress.az-ın Azərtaca istinadən verdiyi məlumata əsasən, Heydər Əliyev Fondu və Mədəniyyət Nazirliyinin birgə təşkil etdiyi festivalın ikinci günündə ilk musiqi proqramı Xan qızı Natəvanın sarayının önündə təqdim olunub. Burada Azərbaycan bəstəkarlarının əsərlərindən ibarət xüsusi konsert keçirilib.
“Romans və mahnı səhəri” adlı proqramda Arif Məlikov, Cahangir Cahangirov, Fikrət Əmirov, Qara Qarayev, Oqtay Kazımi, Süleyman Ələsgərov, Tofiq Quliyev, Üzeyir Hacıbəyli və Vasif Adıgözəlov kimi görkəmli bəstəkarların əsərləri səsləndirilib.
Bu əsərləri gənc ifaçılar – Aqşin Abdullayev, Elnarə Məmmədova, Həmid Abdulov, İsmayıl Zeynalov və Mara Hüseynova təqdim ediblər.
Tədbirdə çıxış edən sənət adamları və tamaşaçılar festival barədə fikirlərini bölüşüblər. Əməkdar artist Aqşin Abdullayev Şuşada çıxış etməyin onun üçün xüsusi mənəvi dəyər daşıdığını qeyd edib. O, “Xarıbülbül” festivalının musiqi beşiyi sayılan Şuşada yenidən təşkil olunmasını böyük hadisə kimi qiymətləndirib və Natəvanın sarayının önündə musiqinin səslənməsini tarixi an adlandırıb.
Müğənni İsmayıl Zeynalov isə festivalda ilk dəfə iştirak etdiyini və bu təcrübənin onda dərin təəssürat yaratdığını bildirib. Onun sözlərinə görə, Şuşanın atmosferi tədbirə xüsusi ruh qatır və şəhər belə musiqi bayramları üçün ideal məkandır.
Qarabağ Universitetinin tələbəsi Kənan Mehdizadə də festivalda iştirakdan məmnunluğunu ifadə edib. O, Azərbaycan bəstəkarlarının əsərlərini canlı dinləməyin gənclər üçün yaddaqalan təcrübə olduğunu vurğulayıb və təşkilatçılara təşəkkürünü bildirib.
