2025-ci ildə Avropa İttifaqının boru kəməri vasitəsilə həyata keçirilən təbii qaz idxalının 8,1 faizi Azərbaycanın payına düşüb.
Elpress.az-ın Azərtac.az-a istinadən verdiyi məlumata əsasən, Energetika naziri Pərviz Şahbazov “Baku Energy Week”də çıxışı zamanı bildirib ki, 2025-ci ildə Avropa İttifaqının boru kəməri ilə təbii qaz idxalının 8,1 faizi Azərbaycanın payına düşüb.O, qlobal enerji bazarlarında müşahidə olunan çağırışlara toxunaraq qeyd edib ki, son dövrlərdə baş verən geosiyasi hadisələr və təchizat riskləri enerji təhlükəsizliyi məsələsini və yeni reallıqda ölkəmizin rolunu daha da aktuallaşdırıb.Nazir vurğulayıb ki, Azərbaycan Xəzər dənizini Qara, Aralıq və Adriatik dənizləri ilə sabit marşrutlar vasitəsilə birləşdirərək həm etibarlı enerji təchizatçısı, həm də Xəzər regionunu Orta Dəhlizin əsas logistika və regional bağlantılar mərkəzinə çevirən mühüm strateji aktor kimi çıxış edir. Onun sözlərinə görə, əgər XX əsrdə enerji gücü əsasən hasilatla ölçülürdüsə, XXI əsrdə bu gücü müəyyən edən əsas amillər təhlükəsiz marşrutlar, bağlantılar və etibarlı tərəfdaşlıqlardır və Azərbaycan bu üstünlükləri birləşdirən ölkələrdən biridir.
