7 mindən çox sakinə sevindirici xəbər: Cəlilabadda 18 kilometrlik yol əsaslı şəkildə yenidən qurulur
Elpress.az xəbər verir ki, Cəlilabad rayonunda nəqliyyat infrastrukturunun müasirləşdirilməsi istiqamətində həyata keçirilən layihələrdən biri olan Sərhədabad–Əliabad–Zəhmətabad–Soltankənd avtomobil yolunun yenidən qurulması işləri sürətlə davam edir. Layihə Azərbaycan Respublikası Prezidentinin müvafiq Sərəncamına uyğun olaraq Azərbaycan Avtomobil Yolları Dövlət Agentliyi (AAYDA) tərəfindən icra edilir.Ümumi uzunluğu 18 kilometr olan avtomobil yolu 7 mindən artıq əhalinin yaşadığı 9 yaşayış məntəqəsini əhatə edir. Yolun yenidən qurulması bölgədə yaşayan sakinlərin rahat və təhlükəsiz hərəkətinin təmin olunmasına, həmçinin yaşayış məntəqələri arasında nəqliyyat əlaqələrinin daha da gücləndirilməsinə xidmət edəcək.Layihə çərçivəsində indiyədək yolun 4,3 kilometrlik hissəsində torpaq işləri tam başa çatdırılıb. Eyni zamanda, 3,3 kilometrlik hissədə yol əsasının alt qatının tikintisi yekunlaşdırılıb. Bundan əlavə, yolun uzunömürlü və təhlükəsiz istismarını təmin etmək məqsədilə müxtəlif ərazilərdə 9 nöqtədə suötürücü boruların quraşdırılması işləri davam etdirilir.AAYDA tərəfindən aparılan tikinti-quraşdırma işlərinin müasir inşaat norma və standartlarına uyğun şəkildə həyata keçirildiyi bildirilib. Layihənin tam başa çatdırılmasından sonra bölgədə nəqliyyatın hərəkəti daha rahat və təhlükəsiz olacaq, sakinlərin gündəlik gediş-gəlişi asanlaşacaq, eyni zamanda rayonun sosial-iqtisadi inkişafı və kəndlər arasında əlaqələrin genişlənməsi üçün əlverişli şərait formalaşacaq.
