Eyvaz Cəfərli İslam maliyyəsi sahəsində təkaful sisteminin mühüm rol oynadığını bildirib.
Elpress.az APA-Economics-ə istinadən xəbər verir ki, “Saf Təkaful Sığorta və Təkrarsığorta Brokeri” MMC-nin direktoru təkafulun İslam maliyyə alətləri üçün əsas mexanizmlərdən biri olduğunu qeyd edib.Onun sözlərinə görə, İslam maliyyəsində sığorta ehtiyacı təkaful modeli vasitəsilə təmin olunur və bu sistem ənənəvi sığortadan fərqli prinsiplərə əsaslanır. Burada faiz, qeyri-müəyyənlik və qumar elementləri istisna edilir.E.Cəfərli bildirib ki, təkaful modelində risklər şirkət tərəfindən deyil, iştirakçılar arasında bölüşdürülür və xüsusi fond vasitəsilə idarə olunur. İl sonunda yaranan artıq vəsait isə iştirakçıların payı kimi nəzərə alınır.O həmçinin vurğulayıb ki, ölkədə İslam maliyyəsinin inkişafı istiqamətində müsbət dinamika müşahidə olunur, sukuk və digər İslami investisiya alətlərinin tətbiqi üzrə işlər aparılır.Qeyd edilib ki, bu proses İslam maliyyə institutlarının investisiya imkanlarını genişləndirəcək və iştirakçılar üçün əlavə gəlir imkanları yaradacaq.
