Elpress.az xəbər verir ki, hər il sentyabrın 20-si Azərbaycanda neft-qaz sənayesində çalışanların peşə bayramı – Neftçilər Günü kimi qeyd olunur.
Bu tarixin neftçilərin peşə bayramı kimi qeyd edilməsi Azərbaycan xalqının Ümummilli Lideri Heydər Əliyevin 16 avqust 2001-ci il tarixli fərmanı ilə rəsmiləşdirilib.Neftçilər Günündə ölkənin neft-qaz sənayesinin inkişafı, əldə olunan nəticələr və qarşıda duran əsas vəzifələr diqqət mərkəzində olur. Sektorun inkişafına töhfə verən, fəaliyyətində xüsusi xidmət və fədakarlıq göstərən işçi və mütəxəssislər dövlət başçısının fərman və sərəncamları ilə fəxri ad, orden və medallarla təltif edilirlər.Sentyabrın 20-nin məhz bu sahədə çalışanların peşə bayramı kimi müəyyənləşdirilməsi isə Azərbaycanın neft tarixində mühüm hadisə ilə bağlıdır. Belə ki, 1994-cü il sentyabrın 20-də Bakıda Xəzər dənizinin Azərbaycan sektorunda yerləşən “Azəri” və “Çıraq” yataqlarının, eləcə də “Günəşli” yatağının dərin sulu hissəsinin birgə işlənməsi və hasil olunan neftin pay bölgüsü prinsipi əsasında bölüşdürülməsi haqqında müqavilə imzalanıb.
Tarixə “Əsrin müqaviləsi” kimi daxil olan bu sənəd Azərbaycanın neft-qaz sənayesinin inkişafında mühüm mərhələ hesab olunur.
