Yağıntılar Quba alma bağlarına zərər vurdu: fermerlər böyük itki ilə üzləşib
Elpress.az xəbər verir ki, Qubada əlverişsiz hava şəraiti almaçılıq təsərrüfatlarına ciddi ziyan vurub. Güclü yağışlar nəticəsində bağlarda yetişən meyvələrin bir hissəsində ləkələr əmələ gəlib və məhsulun keyfiyyəti aşağı düşüb.Fermerlərin sözlərinə görə, məhsulun təxminən 90 faizi dəmgil xəstəliyindən zərər görüb. Bu səbəbdən almaların böyük hissəsini satışa çıxarmaq mümkün olmayıb.Bildirilir ki, əvvəlki illərdə bir hektar bağdan 8-10 min manat gəlir əldə edən fermerlər bu il çəkdikləri xərcləri qarşılamaqda belə çətinlik çəkirlər. Dərman preparatlarına böyük məbləğdə vəsait xərclənsə də, məhsulu xəstəlikdən qorumaq mümkün olmayıb.Emal müəssisələrinin zədələnmiş almaları kiloqramı 5-6 qəpikdən qəbul etdiyi, bazarda isə məhsula tələbatın az olduğu qeyd edilir. Bəzi fermerlər mövsüm ərzində 10-15 min manatadək zərərə düşdüklərini bildirirlər.
