Azərbaycanda qarşıdan gələn uzunmüddətli istirahət günlərində idxal və ixrac əməliyyatlarının ləngiməməsi üçün gömrük xidmətində xüsusi iş rejimi tətbiq olunacaq.
Elpress.az xəbər verir ki, Dövlət Gömrük Komitəsinin aidiyyəti qurumları noyabrın 9-da və 10-da növbəli iş qrafiki ilə fəaliyyət göstərəcək.
Komitənin Mətbuat və İctimaiyyətlə Əlaqələr İdarəsinin yaydığı məlumata əsasən, bu addım qeyri-iş günlərində malların gömrük rəsmiləşdirilməsi prosesinin operativliyini qorumaq və sahibkarların əməliyyatlarında mümkün gecikmələrin qarşısını almaq məqsədi daşıyır.
Qeyd edək ki, 2026-cı ildə Zəfər Günü və Dövlət Bayrağı Günü ilə əlaqədar noyabrın 7-dən 10-dək ardıcıl dörd gün istirahət nəzərdə tutulub. Noyabrın 10-u isə bayram gününün həftəsonu ilə üst-üstə düşməsi səbəbindən əlavə istirahət günüdür.
Beləliklə, istirahət günləri ərzində də gömrük rəsmiləşdirilməsi xidmətlərinin müəyyən edilmiş qaydada davam etdirilməsi təmin olunacaq.
