Ukrayna Prezidenti Volodimir Zelenski ABŞ-nin birinci xanımı Melaniya Trampı ölkəsinin ali dövlət təltiflərindən biri ilə mükafatlandırıb.
Elpress.az xəbər verir ki, Melaniya Tramp birinci dərəcəli “Şahzadə Olqa” ordeninə layiq görülüb. Mükafat Ukraynaya humanitar dəstək, insan hüquqlarının müdafiəsi və müharibədən zərər çəkmiş insanların, xüsusilə uşaqların xilasına yönələn fəaliyyətinə görə təqdim olunub.
Ukrayna Prezidentinin 2 noyabr tarixli, 1079/2026 nömrəli sərəncamında ABŞ-nin birinci xanımının humanitar təşəbbüslərə şəxsi töhfəsi xüsusi qeyd edilib. Sərəncam noyabrın 4-də ictimaiyyətə açıqlanıb.
Melaniya Trampın Ukraynanın Xerson vilayətində yerləşən, Rusiya qüvvələrinin nəzarətində olan Oleşki şəhərində humanitar əməliyyatın həyata keçirilməsinə verdiyi töhfə də diqqət çəkib. Onun vasitəçiliyi ilə oktyabrın 27-dən noyabrın 1-dək müvəqqəti atəşkəs qüvvədə olub. Bu müddətdə mülki əhalinin təxliyəsi və humanitar yardımın çatdırılması üçün şərait yaradılıb.
Melaniya Trampın açıqlamasına görə, əməliyyat nəticəsində təxminən 800 nəfərin təhlükəsiz əraziyə çıxarılması mümkün olub.
Qeyd edək ki, “Şahzadə Olqa” ordeni Ukraynada elm, təhsil, mədəniyyət, dövlət xidməti və xeyriyyəçilik sahələrində xüsusi xidmətləri olan qadınlara verilir.
