8 Noyabr – Zəfər Günü ərəfəsində “Global Media Group” 44 günlük Vətən müharibəsində iştirak etmiş əməkdaşları ilə görüş keçirib. Şirkət onların döyüşlərdə göstərdikləri fədakarlığı və xidmətlərini xüsusi qeyd edib.
Elpress.az xəbər verir ki, görüş zamanı Vətən müharibəsinin iştirakçısı olan əməkdaşlara göstərdikləri igidliyə, cəsarətə və vətənpərvərliyə görə təşəkkür bildirilib.
Müharibə iştirakçıları arasında Baku TV-nin blok redaktoru Yelmar Məmmədli, müxbiri Nursultan Ziyadov, qrafik dizayneri İbrahim Həsənov, eləcə də Oxu.Az-ın müxbiri Murad Həsənov yer alıblar.
Görüşdə Vətən müharibəsinin iştirakçısı olan əməkdaşlarla qürur duyulduğu vurğulanıb. Həmçinin Azərbaycanın ərazi bütövlüyü və azadlığı uğrunda həyatını itirən şəhidlərin xatirəsi ehtiramla yad edilib, qazilərə və Azərbaycan Ordusunun hərbçilərinə minnətdarlıq ifadə olunub.
Qeyd edək ki, 8 Noyabr – Zəfər Günü 2020-ci ildə Vətən müharibəsində qazanılmış tarixi Qələbənin rəmzi olaraq qeyd edilir.
