Avropada yaşayan azərbaycanlı idmançı Sadiq Kərimov Slovakiyada yeni idman məkanını istifadəyə verib. Layihənin əsas məqsədləri sırasında gənclərin idmana cəlb olunması və yeni idmançıların yetişdirilməsi dayanır.
Elpress.az xəbər verir ki, Bratislava şəhərində yaşayan, sambo üzrə dəfələrlə dünya çempionu olmuş Sadiq Kərimovun yeni idman zalının açılış mərasimi keçirilib. Bu barədə Diasporla İş üzrə Dövlət Komitəsi məlumat yayıb.
Açılış zamanı yaradılan məşq şəraitinin xüsusilə gənclərin idmana marağının artırılmasına, peşəkar idmançıların hazırlanmasına və sağlam həyat tərzinin təşviqinə xidmət edəcəyi bildirilib.
Mərasimdə yeni idman məkanının Slovakiyada yaşayan azərbaycanlıların idman sahəsində fəaliyyətinin genişlənməsi baxımından əhəmiyyəti vurğulanıb. Tədbirdən sonra zalda ilk məşq keçirilib.
Qeyd edək ki, idman zalı Bratislavanın Petrjalka rayonunda, Lachova 35 ünvanında yerləşir.
