Azərbaycanın milli bayramları Kanadada da qeyd olunub. Toronto şəhərində təşkil edilən mərasimdə yerli parlament üzvləri, diplomatlar, diaspor nümayəndələri və tələbələr bir araya gəliblər.
Elpress.az xəbər verir ki, 8 Noyabr – Zəfər Günü və 9 Noyabr – Dövlət Bayrağı Günü münasibətilə keçirilən tədbir Diasporla İş üzrə Dövlət Komitəsinin və Azərbaycanın Kanadadakı Səfirliyinin dəstəyi ilə təşkil olunub. Layihəyə “Vətən” Azərbaycan İncəsənət və Mədəniyyət Mərkəzi ev sahibliyi edib.
Mərasimdə Kanada federal və əyalət parlamentlərinin üzvləri, diplomatik nümayəndələr, Azərbaycan icmasının təmsilçiləri və tələbələr iştirak ediblər. Proqram hər iki ölkənin dövlət himnlərinin səsləndirilməsi ilə başlayıb. Daha sonra Vətən müharibəsində həyatını itirən şəhidlərin xatirəsi ehtiramla yad olunub.
Azərbaycanın Kanadadakı müvəqqəti işlər vəkili Vüsal Süleymanov çıxışında 44 günlük müharibədə əldə edilən Qələbənin ölkəmizin tarixində xüsusi yer tutduğunu bildirib. O, azad edilmiş ərazilərdə aparılan bərpa-quruculuq işləri və Cənubi Qafqazda davamlı sülhün təmin olunması istiqamətində görülən tədbirlərdən danışıb.
Torontodakı Azərbaycan Evinin rəhbəri Lalin Həsənova isə Zəfər Gününün milli həmrəyliyin, iradənin və mübarizə əzminin ifadəsi olduğunu vurğulayıb.
Tədbirin bədii proqramında “Mənim Azərbaycanım” həftəsonu məktəbinin şagirdləri milli rəqslərimizi təqdim ediblər. Bununla da Azərbaycanın mədəni irsi və milli dəyərləri tədbir iştirakçılarına nümayiş etdirilib.
