İllik dövriyyəsi 10 min dolları keçən qeyri-rezidentlər elektron vergi uçotuna alınmalıdır
Elpress.az xəbər verir ki, Azərbaycanda elektron ticarət qaydasında iş və xidmətlər təqdim edən xarici şirkətlər üçün yeni vergi tələbləri qüvvəyə minib.Qanuna edilmiş dəyişikliklərə əsasən, Azərbaycandakı alıcılara elektron formada xidmət göstərən qeyri-rezidentlərin ölkədəki dövriyyəsi təqvim ili ərzində 10 000 ABŞ dollarının manat ekvivalentini keçdikdə onlar 30 gün ərzində elektron qaydada vergi uçotuna alınmalıdırlar.Dövriyyəsi müəyyən edilmiş həddən aşağı olan qeyri-rezidentlərin isə elektron vergi uçotuna alınması könüllü əsasda həyata keçirilə bilər.Yeni qaydalar bütün onlayn xidmətlərə şamil edilmir. Elektron poçt və digər interaktiv vasitələrlə göstərilən məsləhət, hüquq, maliyyə, mühasibat, dizayn və mühəndislik xidmətləri, həmçinin internet üzərindən real vaxt rejimində tədris və təlim xidmətləri bu kateqoriyaya daxil edilmir. Elm, təhsil, mədəniyyət, idman və əyləncə tədbirlərinə biletlərin onlayn sifarişi də elektron ticarət qaydasında təqdim olunan xidmətlərə aid edilməyəcək.Qeyd olunur ki, müvafiq qaydada vergi uçotuna alınan qeyri-rezidentlər üçün ƏDV qeydiyyatı, bəyannamələrin təqdim edilməsi və verginin ödənilməsi ilə bağlı prosedurlar səlahiyyətli qurum tərəfindən müəyyənləşdiriləcək.Vergi uçotuna alınmış qeyri-rezidentlər göstərilən xidmətlər üzrə ƏDV-ni hər hesabat dövründən sonrakı ayın son gününədək dövlət büdcəsinə ödəməlidirlər.
