Elpress.az xəbər verir ki, Prezident İlham Əliyev sentyabrın 16-da Qaradağ rayonunda 100 MVt gücündə “Qobustan” Günəş Elektrik Stansiyasının açılışında iştirak edib.
Dövlət başçısına stansiya, layihəni həyata keçirən “Universal Energy” şirkəti və onun Azərbaycandakı fəaliyyəti barədə məlumat verilib. Bildirilib ki, Şanxayda yaradılan şirkət yaşıl enerji və enerji saxlanc sistemləri üzrə layihələr həyata keçirir.
“Qobustan” Günəş Elektrik Stansiyası Azərbaycanda hərrac yolu ilə reallaşdırılan ilk layihədir. Layihənin icrası üçün 2024-cü ildə keçirilən hərracın qalibi Çinin “Universal International Holdings Limited” şirkəti olub.
Stansiyada günəş panelləri, sahə invertorları və transformatorlar quraşdırılıb, kabelləşdirmə işləri tamamlanıb.
İstismara verildikdən sonra stansiyada ildə təxminən 200 milyon kilovat-saat elektrik enerjisi istehsal ediləcəyi gözlənilir. Bu, hər il təxminən 45 milyon kubmetr təbii qaza qənaət etməyə və atmosferə atılan karbon emissiyalarını 97 min ton azaltmağa imkan verəcək.
Stansiyanın fəaliyyəti ilə Azərbaycanda bərpaolunan enerji mənbələrinin ümumi gücü 2170 MVt-a, bu sahədə fəaliyyət göstərən stansiyaların sayı isə 85-ə çatacaq. Bərpaolunan enerji mənbələrinin ölkənin ümumi enerji gücündə payı təxminən 20,8 faiz təşkil edəcək.
Qeyd edək ki, 2027-ci ilin sonunadək Azərbaycanda ümumi gücü təxminən 1,5 QVt olan bərpaolunan enerji layihələrinin həyata keçirilməsi nəzərdə tutulur.
