Şəhid İlqar Hümbətovin əziz xatirəsinə həsr olunmuş cüdo üzrə açıq birinciliyin açılış mərasimi yüksək təşkilatçılıq və xüsusi ehtiram atmosferi ilə keçirilib
Elpress.az-ın Azərtac.az-a istinadən verdiyi məlumata əsasən, Şəhid İlqar Hümbətovin əziz xatirəsinə həsr olunmuş cüdo üzrə açıq birinciliyin təntənəli açılış mərasimi “Təhsil” Respublika İdman Mərkəzinin 8 nömrəli İOEUGİM-in təşkilatçılığı ilə Abşeron Olimpiya İdman Kompleksində keçirilib.Tədbir Dövlət Himninin səsləndirilməsi ilə başlayıb, ardınca Vətən uğrunda canından keçmiş şəhidlərin ruhu bir dəqiqəlik sükutla dərin ehtiramla yad edilib.Daha sonra Şəhid İlqar Hümbətovun həyat yolu, döyüş şücaəti və Vətənə göstərdiyi xidmətlər haqqında ətraflı məlumat verilib, onun xatirəsinin gənc nəsil üçün örnək olduğu xüsusi vurğulanıb.Elm və təhsil nazirinin müşaviri Rüstəm Ağayev çıxışında şəhidlərin xatirəsinə həsr olunan turnirlərin təşkilinin mənəvi və tərbiyəvi əhəmiyyətindən danışaraq, hər bir vətəndaşın şəhidlər qarşısında mənəvi borc daşıdığını diqqətə çatdırıb.Azərbaycan Cüdo Federasiyasının icraçı vitse-prezidenti Rəşad Rəsullu isə bu cür yarışların gənclərdə vətənpərvərlik ruhunun güclənməsinə və sağlam həyat tərzinin formalaşmasına mühüm töhfə verdiyini qeyd edib. O, həmçinin bildirib ki, cüdo yalnız idman uğuru deyil, eyni zamanda şəxsiyyətin formalaşmasında da mühüm rol oynayır.Şəhidin anası Dilarə Hümbətova çıxış edərək Vətən yolunda canından keçən qəhrəmanların xatirəsinə göstərilən yüksək ehtirama görə təşəkkürünü ifadə edib və şəhid ailələrinə göstərilən diqqət və qayğını xüsusi minnətdarlıqla qeyd edib.Açılış mərasimi daha sonra bədii hissə ilə davam etdirilib və tədbirə xüsusi ovqat qatılıb.Qeyd edək ki, turnirdə 2014–2015-ci il təvəllüdlü oğlan və qız cüdoçuların iştirakı ilə gərgin və maraqlı mübarizələr gözlənilir. Ümumilikdə 250-yə yaxın idmançının tatami üzərində çıxışı nəzərdə tutulub.Turnirin əsas məqsədi Şəhid İlqar Hümbətovun əziz xatirəsinin uca tutulması, yeniyetmələr arasında cüdo idman növünün geniş təbliği və gənc idmançıların yarış təcrübəsinin artırılmasıdır.
