Azərbaycanın hərbi hissələrindən birinin hərbçisinin xidmət yerini naməlum şəraitdə tərk etdiyi və Ermənistan ərazisinə keçdiyi bildirilir.
Ermənistan tərəfinin məlumatına görə, hərbçi daha sonra Syunik vilayətinin Şəki kəndində saxlanılıb.
Elpress.az xəbər verir ki, bu barədə Ermənistan Milli Təhlükəsizlik Xidməti məlumat yayıb.Məlumata görə, sentyabrın 29-da Azərbaycan Dövlət Təhlükəsizliyi Xidməti Ermənistanın Milli Təhlükəsizlik Xidmətinə hərbçinin xidmət yerindən ayrılması barədə məlumat verib. Onun Ermənistan sərhədini qanunsuz keçə biləcəyi ehtimalı nəzərə alınaraq hər iki ölkənin aidiyyəti qurumları tərəfindən axtarış tədbirləri həyata keçirilib.Ermənistan tərəfinin açıqlamasında bildirilir ki, oktyabrın 1-də Şəki yaşayış məntəqəsində Ermənistan vətəndaşının ayağından güllə yarası alması barədə məlumat daxil olub. Hadisənin araşdırılması zamanı atəş açanın Azərbaycan hərbçisi olduğu müəyyənləşdirilib və o saxlanılıb.
Hadisənin təfərrüatlarının Azərbaycan tərəfinə də təqdim edildiyi, Ermənistan İstintaq Komitəsində isə faktla bağlı cinayət icraatına başlanıldığı bildirilib.
