AQTA-nın Ağcabədidə keçirdiyi yoxlama zamanı ictimai iaşə obyektində qida təhlükəsizliyi qaydalarının pozulduğu müəyyən edilib.
Elpress.az-ın Azərtac.az-a istinadən verdiyi məlumata əsasən, Azərbaycan Respublikası Qida Təhlükəsizliyi Agentliyinin (AQTA) Qarabağ regional bölməsinin əməkdaşları Ağcabədi rayonu, Ağcabədi–Bəhramtəpə avtomobil yolu üzərində yerləşən, fiziki şəxs Röyal Bəhlul oğlu Səfərova məxsus “Şah” kafesində planlı yoxlama həyata keçiriblər.AQTA-nın İnformasiya təminatı və innovativ həllər şöbəsinin yaydığı məlumata əsasən, yoxlama zamanı qida təhlükəsizliyi sahəsində bir sıra ciddi pozuntular aşkar edilib. Belə ki, istehlaka təqdim olunan ət məhsullarına dair müşayiətedici sənədlərin olmadığı, süd və ət məhsullarının müvafiq etiket məlumatları ilə təmin edilmədiyi, həmçinin məhsulların saxlanılması zamanı mal qonşuluğu prinsipinin pozulduğu müəyyənləşdirilib.Bundan başqa, müəssisədə istifadə olunan suyun filtrasiya edilmədiyi, mexaniki havalandırma sisteminin quraşdırılmadığı, sanitariya-gigiyena normalarına əməl olunmadığı və zəruri təmizlik işlərinin lazımi səviyyədə aparılmadığı da yoxlama zamanı üzə çıxıb.Aşkarlanmış nöqsanlarla əlaqədar sahibkar barəsində inzibati xəta haqqında protokol tərtib olunub. Eyni zamanda, pozuntuların qısa müddətdə aradan qaldırılması məqsədilə icrası məcburi olan göstərişlər verilib.AQTA bildirib ki, əhalinin sağlamlığının qorunması, təhlükəsiz qida məhsulları ilə təminatın gücləndirilməsi və qida təhlükəsizliyi sahəsində qanunvericiliyin tələblərinə əməl olunmasına nəzarət tədbirləri bundan sonra da davam etdiriləcək.
