ABŞ Prezidenti Donald Tramp İranla münaqişəni qısa müddətdə başa çatdırmaq və ya hərbi əməliyyatları dərhal dayandırmadan iqtisadi təzyiqi davam etdirmək arasında seçim edə biləcəklərini bildirib.
Elpress.az xəbər verir ki, Tramp bu barədə oktyabrın 23-də Floridaya yola düşməzdən əvvəl jurnalistlərə açıqlamasında danışıb. O, İranın iqtisadi vəziyyətinin ağır olduğunu, ölkənin inflyasiya və maliyyə çatışmazlığı ilə üzləşdiyini iddia edib.
Amerika liderinin sözlərinə görə, Vaşinqtonun tətbiq etdiyi dəniz blokadası İranın neft ixracına mane olur. Tramp ABŞ-ın qarşıya qoyduğu məqsədlərə artıq nail olduğunu düşünür və Hörmüz boğazından digər ölkələrin gəmilərinin keçməsinə icazə verildiyini bildirir.
Tramp müharibəni tez bitirməyin mümkün olduğunu desə də, iqtisadi təzyiqin davam etdirilməsi variantını da nəzərdən keçirdiklərini vurğulayıb. O, İranın tədricən zəifləməsinə imkan verilməsinin daha məqsədəuyğun olub-olmadığı barədə sual qaldırıb.
ABŞ administrasiyası üçün əsas məsələlərdən biri İran limanlarına tətbiq edilən blokada və Hörmüz boğazında gəmiçilik təhlükəsizliyidir. Bu marşrut qlobal enerji daşımaları baxımından mühüm əhəmiyyət daşıyır. Münaqişə səbəbindən bölgədə gəmi hərəkətinin məhdudlaşması beynəlxalq enerji bazarlarına da təsir göstərib.
Tramp müharibədən əvvəlki dövrlə müqayisədə hazırda boğazdan daha çox neft daşındığını da iddia edib. Bununla belə, münaqişənin nə vaxt başa çatacağı və Vaşinqtonun hansı variantı seçəcəyi ilə bağlı konkret qərar açıqlanmayıb.
