ELPress.az bildirir ki, bu badərə Qafqaz Müsəlmanları İdarəsinin Qazılar Şurası Qurban bayramı ilə bağlı rəsmi fətva yayıb.
Fətvada bildirilir ki, Qurban bayramı İslam aləmində mühüm dini günlərdən biri sayılır və Həzrət İbrahim (ə) ilə Həzrət İsmayıl (ə) hadisəsi ilə əlaqələndirilir. Qazılar Şurası bu günün mənəvi mahiyyətini vurğulayaraq, qurban ibadətinin əsas məqsədinin Allaha yaxınlaşmaq və xeyirxahlığı təşviq etmək olduğunu qeyd edib.
Açıqlamada həmçinin vurğulanır ki, şəriət qaydalarına görə qurban kəsmək Həcc ziyarətində olan zəvvarlar üçün vacib, digər müsəlmanlar üçün isə sünnət əməldir. Qurban ətinin ehtiyacı olanlara paylanmasının isə xüsusi savab olduğu diqqətə çatdırılıb.
Qurumun tövsiyələrində qurbanlıq heyvanların sağlam və müəyyən yaş həddinə uyğun olması, kəsim prosesinin isə gigiyenik və şəriət qaydalarına uyğun şəkildə aparılması bildirilir. Qurban ətinin bölüşdürülməsində ehtiyac sahiblərinə üstünlük verilməsi də məsləhət görülür.
Bildirilib ki, AMEA Şamaxı Astrofizika Rəsədxanasının hesablamalarına əsasən Qurban bayramı 27 may tarixinə təsadüf edəcək və kəsim mərasimləri üç gün davam edə bilər. Bayram namazlarının həmin tarixdə məscidlərdə qılınacağı da qeyd olunub.
Sonda fətvada Azərbaycan xalqına və bütün müsəlmanlara təbrik ünvanlanaraq Qurban bayramının mənəvi dəyərlərinin qorunmasının vacibliyi vurğulanıb.
