Himayədar valideyn olmaq istəyənlər üçün təlim və uşağın seçilməsi mərhələləri qısaldılıb
Elpress.az xəbər verir ki, Himayədar ailə modelinin tətbiqi və valideyn himayəsindən məhrum uşaqların ailə mühitinə reinteqrasiyası ilə bağlı prosedurlar sadələşdirilib.Yeni dəyişikliklər himayədar ailə olmaq istəyən vətəndaşların müraciət prosesinin daha əlçatan və çevik təşkilinə, eləcə də onların daha qısa müddətdə himayədar valideyn kimi fəaliyyətə başlamasına imkan verir.Hazırda himayədar valideyn olmaq istəyən şəxslər uçota alındıqdan sonra 10 iş günü ərzində müsahibəyə cəlb olunur və onların maddi-məişət şəraitinin uşağın mənafeyinə uyğunluğu qiymətləndirilir. Bu mərhələni uğurla keçən namizədlər minimum üç gün davam edən təlimlərə cəlb edilirlər.Yeni qaydalara əsasən, himayədar valideyn-namizədlər üçün təlimlərin onlayn formatda keçirilməsi də mümkün olacaq.Təlimin sonunda keçirilən qiymətləndirmədə müsbət nəticə göstərən namizədlərin istəkləri nəzərə alınmaqla onlara uyğun uşağın seçilməsi müddəti də azaldılıb. Əvvəllər 7 iş günü olan bu müddət 5 iş gününə endirilib.Bundan başqa, himayədar ailə prosesinin ayrı-ayrı mərhələləri üzrə qərarların qəbul edilməsi müddəti konkretləşdirilərək 3 iş günü müəyyən olunub. Bu mərhələlərə müsahibənin keçirilməsi, maddi-məişət şəraitinin müayinəsi, təlim nəticələrinin qiymətləndirilməsi, uşağa uyğun himayədar valideynin və ya namizədə uyğun uşağın seçilməsi, namizədlə uşağın görüşlərinin təşkili və himayədar ailə müqaviləsinin bağlanması daxildir.Dəyişikliklər nəticəsində uşağın himayədar ailəyə keçidi üçün tələb olunan minimal müddətin 2 həftəyədək azaldılması mümkün olub.Himayədar ailə institutu valideyn himayəsindən müxtəlif səbəblərdən məhrum olan uşaqların ailə əsaslı qayğı ilə təmin edilməsində və onların müəssisələrdən ailə mühitinə reinteqrasiyasında mühüm rol oynayır.Qeyd edilib ki, indiyədək 87 uşaq himayədar ailələrə verilib.
