Binəqədi şosesinin iki kəsişməsində zolaqlar artırılacaq və işıqfor rejimi yenilənəcək
Elpress.az xəbər verir ki, Paytaxtın Binəqədi rayonu ərazisində nəqliyyatın hərəkətinin yaxşılaşdırılması və yol təhlükəsizliyinin artırılması məqsədilə yeni dəyişikliklər həyata keçiriləcək.Aparılan təhlillər nəticəsində Binəqədi şosesinin Mehdiabad yolu və Nicat Mustafayev küçəsi ilə kəsişmələrində, xüsusilə pik saatlarda sıxlığın artdığı və yolların mövcud buraxıcılıq imkanlarının kifayət etmədiyi müəyyənləşdirilib.Bu səbəbdən ərazidə yol hərəkətinin təşkili yenidən qurulacaq. Layihəyə əsasən, yol nişanları və nişanlanma xətləri vasitəsilə nəqliyyat axınının istiqamətləndirilməsi həyata keçiriləcək. Kəsişmələrdə hərəkət zolaqlarının sayının artırılması, Əttarlar küçəsindən isə yalnız sağa dönmə imkanının yaradılması planlaşdırılır.Dəyişikliklərin əsas məqsədi yolun buraxıcılıq qabiliyyətini yüksəltmək və nəqliyyat vasitələrinin hərəkəti zamanı yaranan münaqişəli nöqtələri azaltmaqdır.Bundan əlavə, işıqforların fəaliyyət rejimi optimallaşdırılacaq. Əsas istiqamətdə hərəkət edən nəqliyyat vasitələri üçün yaşıl işığın yanma müddətinin artırılması nəzərdə tutulur. Bununla nəqliyyat axınının daha rahat və fasiləsiz hərəkətinin təmin olunması gözlənilir.
