Qusar şəhərində küçələrin asfaltlanması və yol infrastrukturunun yaxşılaşdırılması davam etdirilir
Elpress.az xəbər verir ki, Qusar şəhərində yol infrastrukturunun yenilənməsi ilə bağlı əsaslı təmir işləri həyata keçirilir.İşlər çərçivəsində Asəf Mehman, Aşıq Nüsrət, Nəsimi, Kərim Kərimov və Müslüm Murtuzayev küçələrində asfaltlanma artıq tamamlanıb. Təmir zamanı yolların hərəkət hissəsinin genişləndirilməsi, küçələrin abadlaşdırılması və nəqliyyatın daha rahat hərəkəti üçün şəraitin yaxşılaşdırılması nəzərdə tutulub.Görülən işlərin müasir standartlara uyğun aparılması şəhərdə yol hərəkətinin təhlükəsizliyinin artırılmasına və ümumi şəhər görünüşünün yaxşılaşdırılmasına xidmət edir.Artıq Asəf Mehman küçəsində 2 200, Aşıq Nüsrət küçəsində 6 300, Kərim Kərimov küçəsində 3 720, Müslüm Murtuzayev küçəsində isə 6 600 kvadratmetr yeni asfalt örtüyü salınıb.Cari il ərzində Qusar şəhərində ümumilikdə 18 küçədə əsaslı təmir və asfaltlanma işlərinin aparılması planlaşdırılır.
