“AzerGold” QSC fəaliyyətə başlamasının 10-cu ildönümü münasibətilə anım tədbiri keçirib.
Elpress.az xəbər verir ki, Şirkətin, eləcə də onun törəmə müəssisələri – “Daşkəsən Dəmir Filiz” MMC və “AzerBlast” MMC-nin rəhbər heyəti əvvəlcə Fəxri xiyabana gələrək Ümummilli Lider Heydər Əliyevin xatirəsini ehtiramla yad edib, məzarı önünə gül dəstələri düzüb. Daha sonra akademik Zərifə Əliyevanın məzarı ziyarət olunaraq xatirəsi anılıb.
Tədbir Şəhidlər xiyabanında davam edib. Burada Azərbaycanın müstəqilliyi və ərazi bütövlüyü uğrunda canından keçən şəhidlərin xatirəsi ehtiramla yad olunub, məzarları üzərinə gül dəstələri qoyulub.
Qeyd edək ki, Prezident İlham Əliyevin 11 fevral 2015-ci il tarixli sərəncamı ilə təsis edilən “AzerGold” QSC 5 iyul 2016-cı ildə dövlət qeydiyyatına alınaraq fəaliyyətə başlayıb. Dövlət şirkəti ötən 10 il ərzində faydalı qazıntı yataqlarının kəşfiyyatı, qiymətli metalların hasilatı və satışı istiqamətində fəaliyyət göstərərək ölkənin iqtisadi və sosial inkişafına töhfə verib.
