Palçıq vulkanında güclü alovlanma müşahidə olunub
Elpress.az xəbər verir ki, Abşeron rayonu ərazisində yerləşən Otman Bozdağ palçıq vulkanında sentyabrın 26-da səhər saatlarında növbəti püskürmə qeydə alınıb. Bu, vulkanın müşahidə olunan 12-ci püskürməsidir.Yer elmləri üzrə elmlər doktoru, laboratoriya müdiri Orxan Abbasov bildirib ki, Otman Bozdağ dünyanın ən iri və aktiv palçıq vulkanlarından biri hesab olunur.Onun sözlərinə görə, vulkan son illərdə də aktivliyi ilə diqqət çəkib. Otman Bozdağ 2017, 2018 və 2025-ci illərdə püskürüb. Əvvəlki hadisələrdə olduğu kimi, son püskürmə də güclü alovlanma ilə müşayiət olunub. 2025-ci ildə baş verən püskürmə zamanı alov sütununun hündürlüyü təxminən 1000 metrə çatıb.Orxan Abbasov qeyd edib ki, Elm və Təhsil Nazirliyinin Geologiya İnstitutu Azərbaycanda palçıq vulkanizmi üzrə fundamental tədqiqatlar aparan əsas elmi-tədqiqat müəssisəsidir.Alim bildirib ki, püskürmələrin ətraflı qiymətləndirilməsi məqsədilə hadisədən sonra əraziyə elmi ekspedisiya təşkil olunur. Hazırda vulkanın yeni püskürməsi səbəbindən ərazidə araşdırma aparmaq imkanları məhduddur. Müvafiq şərait yarandıqdan sonra mütəxəssislərin iştirakı ilə ekspedisiyanın keçirilməsi planlaşdırılır.Ekspedisiya zamanı püskürmənin əsas göstəriciləri, püskürmə nəticəsində yaranan materialların yayılma xüsusiyyətləri araşdırılacaq və hadisəyə elmi qiymət veriləcək. Tədqiqatların yekunlarına əsasən püskürmə ilə bağlı əlavə məlumatların təqdim olunacağı bildirilib.
