Paytaxtda axşam leysan ehtimalı var, bölgələrdə temperatur 35 dərəcəyədək yüksələcək
Elpress.az xəbər verir ki, Avqustun 30-u üçün Azərbaycanda gözlənilən hava şəraiti açıqlanıb.Milli Hidrometeorologiya Xidmətinin məlumatına görə, Bakı və Abşeron yarımadasında gün ərzində hava dəyişkən buludlu olacaq və əsasən yağıntı müşahidə edilməyəcək. Lakin axşam saatlarından bəzi ərazilərdə yağış yağacağı, gecəyə doğru isə yarımadanın ayrı-ayrı yerlərində qısamüddətli intensiv leysan və şimşək ehtimalının olduğu bildirilir. Şimal-qərb küləyi arabir güclənəcək.Paytaxtda gecə temperaturu 22-25°, gündüz 27-29° isti olacaq. Atmosfer təzyiqi 759 mm civə sütunu təşkil edəcək.Ölkənin şimal və qərb rayonlarından başlayaraq bəzi ərazilərdə yağış yağacağı proqnozlaşdırılır. Ayrı-ayrı yerlərdə yağıntının leysan xarakterli və intensiv olacağı, şimşək çaxacağı, dolu düşəcəyi ehtimal edilir. Dağlıq ərazilərdə gecə və səhər saatlarında duman müşahidə oluna bilər.Rayonlarda havanın temperaturu gecə 19-24°, gündüz 31-35° isti, dağlıq ərazilərdə isə gecə 12-17°, gündüz 20-25° isti olacaq.
