Azərbaycanın Bolqarıstandakı səfirliyində şəhidlərin xatirəsi yad edilib
Elpress.az xəbər verir ki, 27 Sentyabr – Anım Günü ilə əlaqədar Azərbaycanın Bolqarıstandakı səfirliyində tədbir təşkil olunub. Tədbirin əvvəlində Azərbaycanın ərazi bütövlüyü və suverenliyi uğrunda şəhid olanların xatirəsi bir dəqiqəlik sükutla yad edilib.Tədbirdə Azərbaycanın Bolqarıstandakı səfiri Elmar Məmmədov Anım Gününün xalqın tarixində xüsusi əhəmiyyət daşıdığını bildirib. O, Vətən müharibəsi zamanı Azərbaycan Ordusunun göstərdiyi qəhrəmanlıq və peşəkarlıqdan danışıb.Çıxışlarda 2020-ci il Vətən müharibəsi nəticəsində Azərbaycanın ərazi bütövlüyünün, 2023-cü ildə keçirilən antiterror tədbirlərindən sonra isə ölkənin suverenliyinin tam bərpa edildiyi qeyd olunub.Həmçinin işğaldan azad edilmiş ərazilərə keçmiş məcburi köçkünlərin qayıdışının təmin edilməsi, Qarabağ və Şərqi Zəngəzurda mina təhlükəsinin aradan qaldırılması, eləcə də genişmiqyaslı bərpa və yenidənqurma layihələri barədə məlumat verilib. Bildirilib ki, bölgədə müasir infrastrukturun yaradılması, şəhər və kəndlərin yenidən qurulması və dayanıqlı yaşayış şəraitinin təmin edilməsi istiqamətində işlər davam etdirilir.Tədbirdə Bolqarıstanda yaşayan Azərbaycan icmasının nümayəndəsi Sabir Quliyev də çıxış edib. O, Anım Gününün mənəvi və tarixi əhəmiyyətindən, şəhidlərin xatirəsinin daim ehtiramla yad edilməsinin vacibliyindən danışıb.Daha sonra Azərbaycan Ordusunun Vətən müharibəsindəki fəaliyyətindən bəhs edən “BİZ” sənədli filmi nümayiş etdirilib.Tədbirdə Bolqarıstandakı Azərbaycan icmasının üzvləri və bu ölkədə təhsil alan azərbaycanlı tələbələr iştirak ediblər. Sonda şəhidlərin xatirəsinə ehtiram əlaməti olaraq ehsan süfrəsi təşkil olunub.
